Textos publicados en los libros «Un derbi solidario».
Domingu 31 d´agostu del 2003, más cerca de ser de nueche que ser de día. Uviéu, un chigre cualquiera onde entra pela puerta una rapaz cola bufanda del Real Oviedo. Aquella tarde l´equipu representativu de la capital (duelga a quien-y duelga) xugara´l so primer partíu de la historia en Tercera División contra´l Mosconia de Grau.
-Guaje,¿cómo quedó l´Oviedo?
-Ganó 1-0.
-¿Quién metió´l gol, ho?
-Nun sé cómo se llama, yera negru.
-Que nivel, ¡tenemos estranxeros hasta en Tercera!
Aquel “estranxeru” llamábase y llámase David Álverez, Kily y, probablemente n´aquel momentu, nun sabía que diba pasar pa siempre a la historia del Oviedo. N´aquel momento nun entendíen l´arguyu que significó ver al equipu xugar un partíu de Tercera División y tovía entiendo que dalgunos sigan ensin compréndelo. Que l´Oviedo xugara aquella tarde significaba que siguía vivu, ante 4000 fieles que s´abrazaben unos a otros después del gol de Kily a los 38 minutos y que se saludaben con una sonrisa d´eses de “tú también tas equí” de la qu´entraben al Carlos Tatiere.
Rafa Ponzo, Aláez, Paúl, Merino, Manu, Luismi, Granada, Kily(Jandro´63), Jon Carrera(Omar´87), Armando Barbón y Recamán(Cuétara´58) foron los xugadores oviedistes d´aquella tarde. Cualquiera d´ellos podría ser el protagonista d´esti artículo…unos porque quixeron quedar nel Oviedo, firmando en blanco y cuando la desbandada yera la tónica xeneral…otros porque vinieron a un equipu que nin siquier sabía si l´Ayuntamientu diba permitir-y xugar nel so campo y que diba salir al campeonatu con 6 puntos menos.
La aventura de Kily duró namás aquella temporada y munchos-y perdieron la pista. U.P. de Llangreu, Atlético de Madrid “B”, Orihuela, Novelda, Marino de Lluanco y otra vez al Unión foi la trayectoria d´él primero de volver a los grandes focos d´atención, y esto nun ye una esaxeración…Seguro qu´en dalgún chigre d´Uviéu diose una conversación parecía´l miércoles 25 de xineru de 2012.
-Cagonros, ¿el Kily esi que-y acaba de meter un gol a Senegal na Copa d´África con Guinea Ecuatorial ye´l del Oviedo?
-El mesmu, nin.
-Los asturianos somos la ostia, xugamos cola selección que nos da pola gana!
La vida hai veces que tien coses que inesperaes y coincidencies pretoses. Xusto diez años después del gol al Mosconia, el calendariu quixo que Kily tuviera que volver al Tartiere anque fuera cola camiseta del Noja. Nadie quería que marcara aquella tarde, nun lo fizo, anque nadie debería olvidar que gracies al gol de Kily –ente otres munches coses- aquel muertu “ta mui vivu”.
Miguel Fernandi “Burilo” – Periodista y activista pola oficialidá
Peña Oviedista Barcelona 
Deja una respuesta